ರಾಜ್ಯ ಸರ್ಕಾರದಲ್ಲಿ ಜನಪರ ಸೇವೆಗೆ ಅಗತ್ಯ ಇರುವ ಇಲಾಖೆಗಳಲ್ಲಿಯೇ ಅವಶ್ಯಕ ಹುದ್ದೆಗಳನ್ನು ಭರ್ತಿ ಮಾಡಿಲ್ಲ. ಲಕ್ಷಾಂತರ ಹುದ್ದೆಗಳು ಹಲವು ಇಲಾಖೆಗಳಲ್ಲಿ ಖಾಲಿ ಇವೆ. ಒಟ್ಟು 7,68,975 ಹುದ್ದೆಗಳಲ್ಲಿ ಈ ವರೆಗೆ ವಿವಿಧ ಸಂದರ್ಭದಲ್ಲಿ 5,16,073 ಹುದ್ದೆಗಳನ್ನು ತುಂಬಲಾಗಿದೆ. ಪ್ರಸ್ತುತದವರೆಗೆ ಇನ್ನೂ 2,52,902 ಹುದ್ದೆಗಳು ಖಾಲಿ ಇವೆ.
ಕರ್ನಾಟಕ ರಾಜ್ಯದಲ್ಲಿ ಯಾವುದೇ ಪಕ್ಷ ಅಧಿಕಾರಕ್ಕೆ ಬರುವ ಮುಂಚೆಯೂ, ಬಂದ ಮೇಲು ನಮ್ಮದು ಜನಪರ ಸರ್ಕಾರ ಎಂದು ಹೇಳುತ್ತವೆ. ಆದರೆ ಜನಪರ ಸರ್ಕಾರಕ್ಕೆ ಅನುಕೂಲವಾಗುವ ಪ್ರಮುಖ ಇಲಾಖೆಗಳಲ್ಲಿಯೇ ಅಗತ್ಯ ಹುದ್ದೆಗಳನ್ನು ಭರ್ತಿ ಮಾಡಲಾಗಿಲ್ಲ. ಹೀಗೆ ಯಾವ ಇಲಾಖೆಯಲ್ಲಿ ಎಷ್ಟು ಖಾಲಿ ಹುದ್ದೆಗಳಿವೆ ಎಂಬ ಪ್ರಶ್ನೆಗೆ ಉತ್ತರವನ್ನು ನೀಡಿರುವ ಸರ್ಕಾರ ಈಗ ಕೊಟ್ಟ ಲೆಕ್ಕ 2.50 ಲಕ್ಷಕ್ಕೂ ಹೆಚ್ಚು ಹುದ್ದೆಗಳು.
ಹೌದು. ರಾಜ್ಯದ ಒಟ್ಟು 44 ಇಲಾಖೆಗಳಲ್ಲಿ ಲಕ್ಷಾಂತರ ಹುದ್ದೆಗಳು ಖಾಲಿ ಇರುವ ಬಗ್ಗೆ ರಾಜ್ಯ ಸರ್ಕಾರ ಒಪ್ಪಿಕೊಂಡಿದೆ. ಸಾರ್ವಜನಿಕರಿಗೆ ಪ್ರಮುಖ ಸೇವೆಗಳನ್ನು ಒದಗಿಸುವ ಕಂದಾಯ, ಪರಿಶಿಷ್ಟ ಪಂಗಡಗಳ ಅಭಿವೃದ್ಧಿ ನಿಗಮ, ಹಿಂದುಳಿದ ವರ್ಗ, ಅಲ್ಪಸಂಖ್ಯಾತರ ಕಲ್ಯಾಣ ಸೇರಿದಂತೆ ವಿವಿಧ ಇಲಾಖೆಗಳಲ್ಲಿಯೇ ಹುದ್ದೆಗಳು ಖಾಲಿ ಇರುವುದು ಬಯಲಾಗಿದೆ.
ರಾಜ್ಯ ಸರ್ಕಾರದ ಇಲಾಖೆಗಳಲ್ಲಿಯೇ ಒಟ್ಟು 7,68,975 ಹುದ್ದೆಗಳಲ್ಲಿ ಈ ವರೆಗೆ ವಿವಿಧ ಸಂದರ್ಭದಲ್ಲಿ 5,16,073 ಹುದ್ದೆಗಳನ್ನು ತುಂಬಲಾಗಿದೆ. ಪ್ರಸ್ತುತದವರೆಗೆ ಇನ್ನೂ 2,52,902 ಹುದ್ದೆಗಳು ಖಾಲಿ ಇವೆ.
ಶಿಕ್ಷಣ ಇಲಾಖೆಯ ಅಭಿವೃದ್ಧಿಗೆ ಹೆಚ್ಚು ಒತ್ತು ನೀಡುವ ರಾಜ್ಯ ಸರ್ಕಾರ, ಈ ಇಲಾಖೆಯಲ್ಲಿ ಅಗತ್ಯ ಇರುವ ಇನ್ನೂ 58,298 ಹುದ್ದೆಗಳನ್ನು ಭರ್ತಿಯೇ ಮಾಡಿಲ್ಲ. ಆದರೆ ಇದೇ ತಿಂಗಳಲ್ಲಿ 15 ಸಾವಿರ ಪದವೀಧರ ಪ್ರಾಥಮಿಕ ಹುದ್ದೆಗಳನ್ನು ಭರ್ತಿ ಮಾಡಲು ಮುಂದಾಗಿದೆ. ಹಾಗೆಯೇ 1242 ಸಹಾಯಕ ಪ್ರಾಧ್ಯಾಪಕರುಗಳನ್ನು ನೇಮಕ ಮಾಡಲು ಈಗಾಗಲೇ ಅಧಿಸೂಚನೆ ಹೊರಡಿಸಲಾಗಿದೆ ಅಷ್ಟೆ.
ಯಾವ ಇಲಾಖೆಯಲ್ಲಿ ಎಷ್ಟು ಹುದ್ದೆಗಳು ಖಾಲಿ ?
| ಇಲಾಖೆಗಳು | ಹುದ್ದೆಗ |
| ಪ್ರಾಥಮಿಕ ಮತ್ತು ಮಾಧ್ಯಮಿಕ ಶಿಕ್ಷಣ ಇಲಾಖೆ | 58,298 |
| ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ | 34,858 |
| ಕಾನೂನು ಇಲಾಖೆ | 8,367 |
| ಲೋಕೋಪಯೋಗಿ ಇಲಾಖೆ | 1,720 |
| ಸಣ್ಣ ನೀರಾವರಿ ಇಲಾಖೆ | 1,078 |
| ಕೌಶಲಾಭಿವೃದ್ಧಿ ಜೀವನೋಪಾಯ ಇಲಾಖೆ | 4,140 |
| ಕೃಷಿ ಇಲಾಖೆ | 5,893 |
| ರೇಷ್ಮೆ ಇಲಾಖೆ | 2,994 |
| ಪಶುಸಂಗೋಪನೆ ಇಲಾಖೆ | 9,434 |
| ಆರ್ಥಿಕ ಇಲಾಖೆ | 8,480 |
| ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆ | 5,585 |
| ಒಳಾಡಳಿತ | 28,327 |
| ಸಾರಿಗೆ ಇಲಾಖೆ | 1,559 |
| ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್‌ | 9,395 |
| ಅರಣ್ಯ ಇಲಾಖೆ | 5341 |
| ಸಹಕಾರ ಇಲಾಖೆ | 4,610 |
ಪರಿಶಿಷ್ಟ ಜಾತಿಗಳ ಕಲ್ಯಾಣ ಇಲಾಖೆಯಲ್ಲಿ ಮಂಜೂರಾಗಿರುವ 15, 191 ಪೈಕಿ 9,378 ಹುದ್ದೆಗಳು, ಪರಿಶಿಷ್ಟ ಪಂಗಡಗಳ ಕಲ್ಯಾಣದಲ್ಲಿ ಮಂಜೂರಾಗಿರುವ 2,758 ಹುದ್ದೆಗಳಲ್ಲಿ 2,303 ಖಾಲಿ ಇವೆ. ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಖೆಯಲ್ಲಿ 15,300 ಹುದ್ದೆಗಳಲ್ಲಿ 7,935 ಹಾಗೂ ಅಲ್ಪ ಸಂಖ್ಯಾತರ ಕಲ್ಯಾಣದಲ್ಲಿ 5,619 ಪೈಕಿ 4,417 ಹುದ್ದೆಗಳು ಖಾಲಿ ಉಳಿದಿವೆ. ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆಯಲ್ಲಿ ಒಟ್ಟು 6,865 ಪೈಕಿ 3,088 ಹುದ್ದೆಗಳು ಖಾಲಿ ಇರುವೆ.
